КОКОН (пилла)
КО́КОН , п и л л а – көптөгөн курт-кумурскалардын куурчакчасынын коргонуу түзүлүшү. Кокон личинка куурчакчага айлануунун алдында бөлүп чыгарган жибек жиптен чиеленип курулат. Көптөгөн көпөлөктөр, ошондой эле кээ бир кумурскалар кокон пайда кылат. Көптөгөн коңуздардын личинкалары (мисалы, узун тумшуктар) куурчакчага айланарда өзү бөлүп чыгарган шилекейден Кокон курат. Сөөлжандар, сүлүк курттар, жөргөмүштөр, кээ бир моллюскалар жумуртка коконун (пилласы) пайда кылып, анын ичинде жумуртка өөрчүйт.