БУЛАНАКОВ Дмитрий Григорьевич

БУЛАНАКОВ Дмитрий Григорьевич [10. 02. 1913 (башка маалыматта 23. 02. 1914), Россия империясы, Том губерниясы, Мариинск уезди (азыркы Россия Федерациясы, Кемерово облусу, Чебулинск району), Кураково кыштагы – 18. 11. 1975, СССР, Кыргыз ССРи, Фрунзе (азыркы Бишкек) шаары] – Даңк орденин толук кавалери.

Советтик Армиянын катарына 22. 02. 1942-жылы Тисульск районунун аскер комиссариаты (Новосибирск облусу) тарабынан чакырылып, Улуу Ата Мекендик согушка алгач 2-Белоруссия фронтунун 2-сокку уруучу армиясынын 46-аткычтар дивизиясынын 176-аткычтар полкунда взвод командиринин жардамчысы болуп, 1942-жылдын сентябрь айынан кирген. Кийин Волховск, Ленинград фронтторунда да согушкан. 12. 06. 1944-жылы Фин булуңдагы Триоки (азыркы Зеленоград) шаарына жакын жерде жанындагы жоокерлер менен душмандын 5 жолку контрчабуулунун мизин кайтарып, мындан тышкары жалгыз өзү 8 душманды жок кылганы үчүн 20. 06. 1944-жылы кенже сержант Д. Г. Буланаковго 3-даражадагы Даңк ордени (№ 20985) ыйгарылган. 1944-жылы 17–26-сентябрда Выхма хуторун (Эстония) бошотуудагы эрдиги үчүн 24. 10. 1944-жылы 2-даражадагы (№ 7794), ал эми 16. 02. 1945-жылы Висла дарыясынын (Польша) жанындагы салгылашууда сержант Д. Г. Буланаков жетектеген взвод душмандын 50 солдатын жок кылып, 18ин туткунга алган. Бул эрдиги үчүн 26. 06. 1945-жылы ал кезектеги, 1-даражадагы Даңк ордени (№ 373) менен сыйланган. 1946-жылы дембилизациялангандан кийин Кыргызстанга келип, өмүрүнүн аягына чейин Фрунзе шаарындагы «Красный металлист» заводунда эмгектенген. Кызыл Жылдыз ордени (17. 01. 1945) ж.б. медалдар менен сыйланган.

Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.