КАРА-КУЛЖА (Кара-Дарыянын оң куймасы)
КАРА-КУЛЖА – Кара-Дарыянын оң куймасы, Ош облусунун Кара-Кулжа районунун аймагы аркылуу аккан суу. Узундугу 104 км, алабынын аянты 1200 км2. Фергана тоо тизмеги м-н Үч-Сейит тоосунун кошулушунан башталып, Фергана ж-а Тасырак-Сай тоолорунун аралыгы м-н агат. Ири куймалары: Шоорук-Жылга, Үч-Сейит, Сурташ, Токсон-Кемпир, Көк-Жаңгак (оң), Качуркөл, Кашка-Суу, Талды-Суу, Беш-Мойнок (сол) ж. б. Жылдык орточо чыгымы 21,3 м3/сек. Ар бир чарчы км аянтынан агып чыккан суунун модулу Кыргызстандын аймагы боюнча эң көп (22 л/сек.км2). Аталышы суу киргенде тоо беттеринен ар түрдүү тектерди агызып, каралжын тартып, ылайланып агышынан пайда болгон. Боюнда (төмөнкү агымында) Кара-Кулжа кыштагы жайгашкан.