КИНДИК ЭНЕ

КИНДИК ЭНЕ – бала төрөлгөндө киндигин кес­кен аял; К. э. баланы биринчи көрүп, ата-эне­сине сүйүнчүлөгөн адам, ал – баланын өмүр бою урматтап, сыйлап жүрөр энеси. Кыргыз эли жарык дүйнөгө келген ымыркайды биринчи жерден алып, киндигин кесип, киндик канын жерге тамызып, ороп алууну өтө кастарлуу, сый­мыктуу иш катары баалашкан. Баланын кулк­мүнөзү, кайраты киндик энесине жараша болот деген түшүнүк б-ча К. э-ни кайраттуу, үлгүлүү, алпейим, дили ак аялдардан тандашкан. Ошон­дон улам элде «жетемди эмес, жерден алганым­ды тартам» деген сөз айтылып калган. Киндик кесүүчү аспап катуу, сүрдүү болгон. Байыркы мезгилде кыргыз эли баланын киндигин муз м-н кесип, муздай тунук, сууктай кайраттуу бол­сун деп ырымдашкан. «Кыргыз эли муз менен киндигин кескен тууштуу элбиз» деген сөз эм­дигиче айтылат. Киндик кесүү ак бата айтуу м-н коштолгон. Баланын жети энеси болот. Алар: киндик эне, өз эне, чоң эне, таене, кайын эне, өкүл эне, аяш эне. Киндик эне – булардын эң алгачкысы. Учурда балдардын киндик энеси врачтар болуп калды.

Ы. Кадыров.