КЕЧУА
КЕ́ЧУА , к и ч у а – Түштүк Америкадагы индей эл
деринин бири. Перу, Боливия, Эквадор, Колумбия, Түндүк-Батыш Аргентина ж-а Түндүк Чилиде жашашат. Жалпы саны 10 млн киши (2008). Кечуа тилинде сүйлөшөт. Көпчүлүгү католиктер. Инктер мамлекетинин пайда болушу кечуа урууларынын этностук жактан биригишине түрткү берген. Колониялык мезгилдин (19-кылымдын 1-чейреги) аягында кечуа эл болуп калыптанып, маданияты өнүккөн. 19-кылымдын 70- жылдары кечуалар шаарларга (негизинен Лима шаарына) көчө баштаган.
Негизинен айыл чарбасында иштеп, айрымдары кол өнөрчүлүк кылышкан. Эркектери тизеге чейин кыска шым, кыска күрмө ж-а кездемеден тигилген пончо, башына фетр калпак же жүндөн токулган шлем (чульо), бутуна тери бут кийим кийишет. Аялдар кабатталган юбка кийип, ийиндерине оромо жамынып, темир, таш, сөөк ж-а үлүлдөн жасалган кооздуктарды тагынышат.