КЕЧИЛДИК
КЕЧИЛДИК – диний социалдык топ. Анын мүчөлөрү «бул дүйнөдөн кечүү», үй-жай, мүлктөн баш тартуу, үйлөнбөй так өтүү, туугандык жана социалдык байланыштардан биротоло кол үзүү, белгилүү бир монастырда жашоо, анын уставына баш ийүү сыяктуу катаал тартиптеги турмушта өз ыктыяры менен жашап, өмүр кечирет. Кечилдик алгач биздин заманга чейинки 1-миң жылдыктын орто ченинде буддизмде (Индия) пайда болгон. Кийинчерээк Кытай, Жапония, Тибет, Түштүк-Чыгыш Азия жана Ыраакы Чыгыш өлкөлөрүндө өнүккөн. Биздин замандын III кылымында христианчылыкта түзүлө баштаган (протестантизмде кечилдик жок). Кээде (толук туура келбесе да) кечилдикке мусулман дервиштерин да кошушат.