КВАНЖУ
КВАНЖУ́ – Корей Республикасынын түштүк-батышындагы шаар. Йонсанган түздүгүндө, Сеулдан 320 км түштүктө жайгашкан. 1986-жылдан шаар айланасы м-н провинциянын деңгээлиндеги статуска ээ. Калкы 1,3 млн (2008; шаар айланасы м-н 1,6 млн). Жолдор тоому. Метрополитен (2004) иштейт. Алгач Корё мамлекетин негиздеген король Ван Гон бийлеген мезгилде 940-жылы эскерилген. 1948–2005-жылдарда Чолла-Намдо провинциясынын административдик борбору болгон. Шаар агломерациясынын чыгыш бөлүгүн Мудынсан паркы ээлейт. Анын этегинде будда храмдары жайгашкан. Кванжу өлкөнүн ири өнөр жай борбору. «Kia Motors» компаниясынын автомобиль заводу (жылына 350 миң), аккумулятор батареялары, электроника приборлорун ж-а алардын компоненттерин өндүрүүчү, текстиль (кебез-кездеме), тамак-аш (айыл чарба азыктарын белендейт ж-а сактайт) өнөр жай ишканалары иштейт. Тогуз ЖОЖ (анын ичинде улуттук, педагогикалык ж-а жеке менчик), музейлер (анын ичинде улуттук, көркөм ж. б.), мемориалдык парк бар. Айыл чарбалуу аймактын ири борбору. Шалы, курма өстүрүү, жүзүмчүлүк өнүккөн. Шаардан 50 км түндүк-батышта «Йонгван» АЭСи (Азиядагы эң ири; кубаттуулугу 5900 МВт) курулган.