КАЛПАКОВ
КАЛПАКОВ Байсерке (1882, Ысык-Көл облусу, Тоң району – 1941, Россия, Урал) – драматург, акын. 1910–1911-жылдары медреседен окуп, кийин ошол эле жерде мугалим болгон. Калпаков 1918-жылдан «Тилчи», «Көмөк», «Кембагалдар авазы», «Эркин-Тоо» гезиттеринде иштеген. «Талап» адабий ийриминин мүчөсү катары контрреволюциялык иштерди жүргүзгөн деген саясий күнөө коюлуп айдалган. Кол жазмалары сакталган эмес. Басма сөз беттерине жарыяланган ырлары, макалалары, фельетондору: «Биздин журт», «Май майрамы», «Акмат менен Байгана», «Кайгы күн – 21-январь», «Сагынам», «8-март». Булардын ичинен «Акмат менен Байгана», «Сагынам», «Май майрамы» деген ырлары кыргыз акындарынын 1927-жылы Москвадан чыккан «Кызыл гүл» деген ыр жыйнакка кирген. Калпаковдун адабияттагы жашырын аты «Шоокум», сатираларын «Чанчуур» деген ат менен жарыялап турган. Эл арасында «Байсерке чечен» деген ат менен кеңири белгилүү болгон. Калпаков адабият майданында ар түрдүү жанрда иштеген. 1957-жылы 31-июлда акталган.