КАРГАША КӨМҮР КЕНИ
КАРГАША КӨМҮР КЕНИ Ош облусунун Өзгөн районунда, Өзгөн шаарынан 60 км чыгыш тарапта, Фергана тоо тизмегинин түштүк-батыш капталында. Мындагы көмүр жергиликтүү элге илгертен белгилүү. 1942–55-жылдарда геологиялык чалгындалып, запасы эсептелген. Кен Өзгөн көмүр бассейнинин түндүк-батыш тарабынан орун алып, эни 9 км, узундугу 13 км аянтты ээлейт. Кен «Сол өйүз», «Оң өйүз» ж-а «Түндүк-чыгыш» деп аталган үч участкадан турат. Аймагында юра мезгилинде пайда болгон чөкмө тоо тек катмарлары таралган. Көмүр негизинен кумдук, алевролит, аргиллит ж-а көмүрлүү сланецтердин арасында кездешет. Кендеги көмүр катмарынын ичинен V, VI–VII, VIII калың катмарларга кирет. Көмүр гумустуу, коксталат. Күйгөндө 34,3 МДж/кг жылуулук берет. Запасы С2 категориясы боюнча 129193 миң т (1992).