КАРА-ШОРО МИНЕРАЛДУУ СУУСУ
КАРА-ШОРО МИНЕРАЛДУУ СУУСУ , К о ң у р - Д ө б ө м и н е р а л д у у с у у с у – Ош облусунун Өзгөн районундагы дарылыкка ичүүгө жарамдуу минералдуу муздак суу булактары. Өзгөн шаарынан 80 км чыгыш тарапта, Фергана тоо тизмегинин түштүк-батыш капталындагы Жазы ж-а Коңур-Дөбө сууларынын кошулган жеринде, деңиз деңгээлинен 2300 м бийикте. 1945-жылы табылып, сууну пайдалануу мүмкүнчүлүгүн аныктоо үчүн 1948–54-жылдарда изилденген. Суу булак түрүндө ж-а тереңдиги 70–130 м келген 14 бургулоо көзөнөктөрүнөн чыгат. Булактар юра мезгилинин башталышындагы кумдук, алевролит, аргиллит, чополуу сланец, гравелит ж-а конгломерат катмарлардан (калыңдыгы 700 м) чыгат. Көмүр кычкыл газдуу минералдашкан (5–6 г/л) сууларга кирет. Түссүз, жытсыз, даамы кычкыл, суунун температурасы 7,6–14,5°С. Курамы боюнча Есентуки суусуна окшош. Запасы суткасына 0,197 миң м3 (1971). Суу бөйрөк, боор, ичеги-карын, кан басым, диабет ооруларына пайдалуу.