КАМАШЕВ
КАМАШЕВ Билаш (25. 3. 1927, Чүй району, Чым-Коргон кыштагы – 9. 5. 1990, Бишкек) – геолог, Кыргыз ССР мамлекеттик сыйлыгынын лауреаты (1980). Москва геологиялык чалгындоо институтун бүткөн (1951). «№ 14 Почтовый ящик» объектисинде геолог, улук инженер, башкы геолог (1951–60), Кыргыз геология башкармалыгында геологиялык текшерүү бөлүмүнүн начальниги (1960–69), Түндүк Кыргызстан геологиялык экспедициясында чалгындоо иштери боюнча улук геолог (1969–73), Кыргыз ССР геология башкармалыгында, Кыргыз геология өндүрүштүк бирикмесинде бөлүмдүн начальниги (1973–87). Кыргызстандагы сейрек кездешүүчү металлдардын кендерин, металл эмес кен байлыктарды издөө, геологиялык чалгындоо иштерин уюштуруу, геологиялык жактан контролдоо боюнча эмгектенген. «Ардак белгиси» ордени м-н сыйланган.