ИНКРУСТАЦИЯ
ИНКРУСТА́ЦИЯ (лат. incrustatio – кабык, катмар м-н жабам, мрамор чаптайм) – буюмдарды оймолоо ж-а мрамор, карапа, металл, жыгач ж. б-дын майда бөлүктөрү м-н нерсенин бетине сүрөт чөгөрүп түшүрүү. Инкрустациянын жыгачты жыгачка, металлды металлга, ташты ташка чөгөрүп, сүрөт түшүргөн түрлөрү да болот. Бирок инкрустация көп учурда кооздолчу нерсенин өзүнөн башка материалдан жасалат. Байыркы Чыгыштын, антикалык доордун скульптураларында статуя м-н бюсттун көздөрү инкрустация м-н өзгөчөлөнүп турган. Азыр курулушта карапа күкүмү м-н бетон дубалдардын бетин кооздоо да инкрустация деп аталат.