ИЙҮҮ
ИЙҮҮ м а т е м а т и к а д а – бетти өзгөртүү же деформациялоо; мында ал бетке жүргүзүлгөн ар бир сызыктын жаасынын узундугу, ошондой эле бетте жайгашкан бурчтун чоңдугу м-н фигуранын аянты да өзгөрбөйт. Мисалы, бир барак кагаз цилиндр же конус түрүндө оролгондо (чоюлбас кагаз), анда кагаздын бетиндеги сызыктар өзгөрбөйт. Бетти ийүү – дифференциал геометриясынын негизги маселеси. Анын бири – Гаусс теоремасы. Азыркы дифференциал геометриясында ар түрдүү беттерди ийүү мүмкүн же мүмкүн эместигин изилдөө негизги орунду ээлейт. Ар бир туюк томпок беттин (мисалы, толук сфера, бүтүн эллипсоид) ийилбестиги далилденген; эгер мындай беттен мүмкүн болушунча кичине бөлүгүн кесип алсак, анда калган бөлүгү ийилиши мүмкүн. Евклид мейкиндигинде беттерди ийүү беттерди кичине аянтка ийүү ж-а толук бетте бүтүндөй ийүү болуп бөлүнөт.