БАЙЛАНЫШ КАБЕЛИ
БАЙЛАНЫШ КАБЕЛИ – сигналдарды электр же оптикалык түрдө өткөрүүчү зым. Ал аркылуу телеграмма жана фототелеграмма, телефон аркылуу сүйлөшүүлөр, теле кабар, статистикалык маалымат, теле механикалык системанын сигналдары берилет. Байланыш кабели симметриялуу жана коаксиалдуу конструкцияда; берилүүчү жыштык спектри боюнча - төмөнкү (10 кГц тен кичине) жана жогорку (10 кГц тен чоң) жыштыктагы; колдонуу тармагына жараша - алыскы (шаар аралык) жана жергиликтүү кабель болуп, асма, жер жана суу астына орнотулат. Линиянын ток өткөрүүчү бөлүгүнүн диаметри 0,3–1,6 мм жез зымдан жасалып, изоляцияланган зымдары экиден (бир тизмек) жана төрттөн (эки тизмек) чыйратылат. Симметриялуу байланыш кабелиндеги түгөйлөш зымдын саны 1–3600гө (тажрыйбалык керме 4800гө), коаксиалдуу байланыш кайбелинде 2–20га жетип, түгөйлөш ар бир керме боюнча 3600гө жакын телефондук сүйлөшүүлөр жүргүзүлөт.