КОЛУМБИЯ (Канада м-н АКШдагы дарыя)

КОЛУ́МБИЯ – Канада м-н АКШдагы дарыя. Узундугу 2000 км, алабынын аянты 669 миң км². Аска­луу тоолордогу Колумбия көлүнөн башталып, Тынч океанга куят. Бул жерде узундугу 75 км, аянты 412 км² болгон эстуарий пайда болгон. Ири куй­масы – Снейк (сол). Колумбия платосунан кууш өрөөн аркылуу агып, Каскад тоолорун кесип өтөт. Суусу жаз, жай мезгилдеринде тоодогу кар, мөңгүлөрдүн эришинен ташкындап, кышында тартылат. Орточо чыгымы төмөнкү агымында (Те- Далс шаары тушта) 5200 м³/сек, жылдык агымы­нын көлөмү 164 км³. Колумбия гидроэнергетикалык ресурстарга бай; анда суу сактагычтар ж-а ири ГЭСтер курулган; АКШда гидроэнергетиканын 50%и Колумбия дарыясындагы ГЭСтерден өндүрүлөт. Ири ГЭСтери: Чиф-Жозеф, Гранд-Кули, Те-Далс, Мак-Нэри ж. б. 749 км аралыкка чейин кеме каттайт; де­ңиз кемелери Портленд, биржалар Ричленд ш-на чейин жетет. Боюнан Уэнатчи, Ричленд, Ванку­вер, Астория шаарлары (АКШ) орун алган. Колумбия ж-а анын жээктери аңчылыкта, балык уулоодо, суу спорту м-н машыгууда кеңири пайдаланылат.