АСКАРИДАЛАР

(Ascarudas) – адам ж-а омурткалуу жаныбардын ичегисинде мителик кылуучу жумуру курттар. Киши ж-а чочко А-ы кеңири таралган. Ургаачысынын уз. 25-40, эркегиники 15-25 см. Ургаачысы суткасына 250 миңге чейин жумуртка тууйт, ал тамак же суу аркылуу кишинин ичегисине кирип, андан личинка жетилип, ичегинин былжыр челин көзөп, вена канына өтөт да, кан агымы м-н жүрөккө, андан өпкө ж-а кекиртек аркылуу 2-жолу оозго барып, тамак сиңирүү системасына өтөт. Личинка ичке ичегиде чоң митеге айланып, 2-2,5 айдан кийин жумуртка тууй баштайт. Ал жумурткалар ээсинин заңы м-н сыртка чыгат. А. коркунучтуу оору – аскаридозду пайда кылат.