АРГОС

АРГОС– Пелопоннес жарым а-нын (түш. Грекия) түн.чыгышындагы байыркы шаар. Калкы 25 миң киши (2011). Б. з. ч. 2-миң жылдыктын 2-жарымында эле ири борбор болгондуктан, байыр­кы акындардын чыгармаларында айрым учурларда бүткүл Грекия А., ал эми гректер аргивяндар деп айтылган. Микен цивилизациясы кыйрагандан кийин A-ту дорийлер мекендеп калышкан. Б. з. ч. 8-6-к-да алардын бийлиги Пелопоннестин түн.-чыгышына тарап, шаар кайрадан гүлдөп-өскөн. A-то монархия б. з. ч. 5-к-га чейин өкүм сүрүп, андан соң демократия орногон.Тышкы саясатында А. м-н Спартанын ортосунда жер үчүн күрөштөр болуп турган. Б. з. ч. 229-жылдан Ахей союзуна, б. з. ч. 2-к-дын экинчи жарымынан Римдин бийлигине өткөн. Б. з. 267- ж-а 395-ж. Готтор тарабынан талкаланган. Бүгүнкү күнү А. Грекиядагы туристтик борборлордун бири. Шаарды археол. изилдөө учурунда Микен дооруна тиешелүү сепилдин, Зевс м-н Афины храмынын, 20 миң орундуу театрдын, музейлердин ж. б. калдыктары табылган.