АКЫР ЗАМАН

‒ адам баласынын ж-а бүткүл ааламдын эӊ соӊку тагдыры тууралуу байыркы доордон бери калыптанган түшүнүк. Мындай түшүнүк байыркы еврейлердин тооратында, христиан дининин инжилинде айтылып, Куранга да киргизилген. Бул түшүнүк б-ча А. з. адилеттик м-н зулумдуктун, жакшы м-н жамандыктын, жарык м-н караӊгылыктын көрүнбөгөн жашыруун күрөшүнөн башталып, жержүзүндөгү ыймансыздык м-н зулумдук ниет күч алат. Ислам дининде А. з. тууралуу ишеним кудайдан коркуу эрежеси м-н байланыштырылат. Анда Алла Таала тек кудайдан корко турган адамдарды гана сүйөрү, андай адамдар үрөйдү учурган сурак күнүндө да, кубаныч -сүйүнүч учурунда да, кайгыда да бир кудайга сыйынган, кек сактабай башкалардын күнөөсүн тез кечиришип, жакшылык жасай турган адамдарды гана жактырары айтылат.

                                                                                                                      Б. Солтонбеков.