«КЫССА-И-СЕМЕТЕЙ БУ ТУРУР»

«КЫССА-И-СЕМЕТЕЙ БУ ТУРУР» («Бу Семетей ж-дөгү дастан») – «Семетей» эпосу тууралуу кол жазма. Эпос 2 бөлүктөн турат ж-а араб тамгасы м-н көркөмдөлүп жазылган. Анын түп нуска­сын Талас өрөөнүнүн Кең-Арал айлынын жа­шоочусу Жунуш Молдодон ад-тчы Ш. Үмөталиев алып, 1957-ж. Кыргыз ССР ИАнын Кол жазма­лар фондусуна өткөргөн. Айрым маалыматтар б-ча 19-к-да Балыкооздон жазып алган Токто­газы Жусупбек уулу (1864–1933) таластык Жанаалы деген карыяга берген. 1972-ж. проф. С. Кудайбергенов ал кол жазманын түп нуска­сын сүрөткө түшүрүп, көчүрмөсүн УИАнын Кол жазмалар фондусуна өткөргөн. Кол жазма 6120 ыр сабынан (117 бет) туруп, майда тамгалар м-н ар бир барактын бетине үч катардан жыш жазылган. Бул кол жазма лирикалык роман­тикалуу багыттагы дастан ж-а кыргыздардын совет дооруна чейинки жазма тарыхын үйрөнүү үчүн баалуу булактардын бири.