БОКАРЕВ

БО́КАРЕВ Иван Васильевич [17. 05. 1923, РСФСР, Кыргыз АССРи (азыркы Казакстан Республикасы), Жети-Суу (азыркы Алматы) облусу, Ак-Суу (азыркы Сарканд) району, Бакалы кыштагы] – Даӊк орденинин толук кавалери. 1934-жылы үй-бүлөсү менен Кыргызстандын аймагындагы Кемин районунун Боролдой кыштагына көчүп келип, жашаган. Согушка чейин ошол жерде колхоздо комбайнчы болуп иштеп, 1942-жылы (айрым маалыматтарда 1943) Кемин райондук аскер комиссариаты тарабынан Советтик Армиянын катарына чакырылган. Снайперлер мектебин бүтүргөндөн кийин (1943, март) фронтко жөнөтүлгөн. Улуу Ата Мекендик согуш учурунда ал аткычтар полкунун чалгынчылар взводунда бөлүмчөнүн командири болуп, 10. 08. 1944-жылы кенже сержант И. В. Бокарев Тамошув (Польша) кыштагына жакын жерден душмандын окобуна кирип барып, гон. Биринчи Украин фронтунда согушуп, Украинанын сол жээгин, Запорожьени бошотууга, Львов-Сандомир операциясына катышкан. Луцк жана Житомир шаарларын бошотууда жана Польшадагы ийгиликтүү чалгындоо операциясы үчүн ал 1944–45-жылдары үч жолу Даӊк орденин (1944-жылы 28-августа, ошол эле жылы 21-октябрда жана 1945-жылы 14-мартта) алууга татыктуу болгон. Согуштан кийин республиканын чарба иштеринде эмгектенген. 1-даражадагы Ата Мекендик согуш, 3-даражадагы «Манас» ордендери жана медалдар менен сыйланган. Бишкектин Жеңиш аянтындагы мемориалдык тактага ысмы жазылган.