КАРАКОЛ (Ички Теңир-Тоодогу суу)

КАРАКОЛ – Ички Теңир-Тоодогу суу, Чоң На­рындын сол куймасы. Жогорку Нарын тектон. ойдуңунун батыш жагында. Нарын р-нунун ай­магы аркылуу агат. Уз. 51 км, алабынын аян­ты 585 км². Борколдой ж-а Чоң Үзөңгү-Кууш (Кум-Бел) тоолорунун аралыгында жаткан Жа­галмай мөңгүсүнөн башталып, Келин-Тайгак суусуна чейин Жагалмай деп аталат. Баш жа­гында өрөөнү кенен (0,4–0,8 км), ортоңку бөлүгү бийик кашаттуу (7 кашат), төмөнкү агымы капчыгайлуу (0,1–0,2 км). Май – июнь айла­рында суусу кирип, сентябрда тартылат. Ири куймалары: Ашуу-Чакыр-Корум, Туюк-Чакыр- Корум (оң), Келин-Тайгак, Жайык, Беш-Кашат (сол).