ЖЭКСОНВИЛЛ

ЖЭ́КСОНВИЛЛ – Америка Кошмо Штаттарынын түштүк-чыгышында­гы шаар. Флорида жарым аралынын түндүк-чыгышында, Сент-Жонс дарыясы Атлантика океанына куя бе­риште жайгашкан. Флорида штатында. Калкы 1 млн (2024; агломерациясында 1,2 млн). Аянты боюнча (2,3 миң км²; ички 302 км² аквато­риясы менен) Америкадагы чоң шаарлардын бири. Ири жолдор тоому. Эл аралык аэропорту бар. Терең деңиз порту (2006-жылы 2,3 млн т жүк та­шылган). Круиз терминалы (Багама аралдары жана Ки-Уэст аралы менен байланышат). 18-кылымдын ая­гында испаниялык Флориданын курамында Кауфорд тургун жайы катары негизделген. 1821-жылы АКШга карап, алгачкы аскер губерна­тору генерал Э. Жэксондун урматына азыркы­дай аталган. 1832-жылдан шаар. Кеме куруу, жыгаччылык, целлюлоза-кагаз, тамак-аш, кара металлургия, металл иштетүү өнөр жай ишканала­ры иштейт. Университеттер, китепкана, музейлер, зоо­парк бар. Жыл сайын музыка, 1984-жылдан кино фестивалдары өткөрүлүп, көргөзмө борбо­рунда айыл чарба ярмаркалары (жыл сайын) болуп турат. Аскер-деңиз флотунун жана деңиз авиа­циянын базасы. Шаарга жакын «Форт Кэро­лайн» улуттук мемориалы жайгашкан.