КАЛЕ

КАЛЕ́ – Франциянын түндүгүндөгү шаар. Па­де-Кале департаментинде. Калкы 72,9 миң (2008; шаар айланасы м-н 100 миң). Па-де-Кале кысы­гынын жээгинде, Дувр (Британия) портунун ту­шунда жайгашкан. Порт (жылына 41,5 млн т жүк ташылат). Тез ылдамдыктагы темир жол аркы­луу Париж, Лондон ж-а Брюссель шаарлары м-н бай­ланышат. Шаар 8-кылымдан белгилүү. Шаардагы эмгекке жарамдуу калктын 68%и тейлөө чөйрө­сүндө эмгектенет. Анын башкы секторлору: транспорт ж-а логистика. Текстиль, тигүү (анын ичинде тор токуу, аялдардын тигилүү көйнөгү ж. б.), электр-техника (анын ичинде суу астында иштөөчү телеком­муникация ж-а электр кабелдери), химия, тамак­-аш өнөр жай ишканалары иштейт. Мэриянын коң­гуроолуу имараты же «беффруа» (20-кылымдын башы) Бүткүл дүйнөлүк мурастын тизмесине кирген. Кароол мунарасы (13-кылым), Нотр-Дам чиркөөсү (13–15-кылымдар), 17-кылымдын фортификация курулуштары сакталган. Университет, музейлер бар.