«АЛА-ТОО ЖАЗЫ» фестивалы

«АЛА-ТОО ЖАЗЫ» ‒ музыка фестивалы. Кыргызстанда алгач 1966-жылы июнь айында өткөрүлгөн. Кийин ал салтка айланып, 1967, 1969, 1974-жылдарда «Элдердин достугу» деген ураан менен өткөрүлгөн. Кыргызстанда фестиваль күндөрүндө Мамлекеттик академиялык симфониялык оркестр, Бүткүл союздук радио менен Борбордук телекөрсөтүүнүн симфониялык чоӊ оркестри, Ленинград жана Горький филармонияларынын симфониялык оркестрлери, М. Пятницкий атындагы мамлекеттик хор, Дагестан АССРинин мамлекеттик бий ансамбли, Сибирь бийлеринин Красноярскийдеги мамлекеттик ансамбли сыяктуу чыгармачыл ири коллективдер өнөрлөрүн көрүшкөн. Бул фестивалдарга көрүнүктүү композитор Т. Н. Хренников, В. Т. Соловьев-Седой; дирижёрлор Е. Светланов, К. Иванов, Б. Хайкин, Ю. Темирканов, О. Дмитриади; аткаруучулар И. Архипова, А. Огнивцев, Ю. Мазурок, Р. Стручкова, В. Бовт, Г. Гаспарян, Т. Кудзик, Р. Жаманова, М. Сабирова, Т. Чебан, Т. Серебряков, А. Бабакулов, М. Эсамбаев, М. Магомаев, Б. Бенцианов катышып, Кыргызстандын эли менен чыгармачылык жолугушуу өткөрүшкөн. 1966-74-жылдарда 800гө жакын концерт коюлган. Фестивалдын активдүү катышуучулары Е. Светланов менен М. Эсамбаевге «Кыргыз ССРинин эл артисти», Р. Тихомировго «Кыргыз ССРинин искусствого эмгек сиӊирген ишмери», Б. Бруновго жана Б. Бенциановго «Кыргыз ССРинин эмгек сиӊирген артисти» деген ардактуу наамдар берилген.