КОЗУБЕКОВА

КОЗУБЕКОВА Мейликан (16. 10. 1932, Талас району, Түлкү-Төбө айылы – 9. 5. 1974, Фрунзе) – комузчу, солист, Кыргыз ССРинин эмгек сиңирген артисти (1967). 12 жашынан комуз черткен.

1955-жылы Та­лас районунун өздүк көркөм чыг­армачылыгынын республикалык кароосуна катышып, биринчиликке жетишкен. 15 жашында Кыргыз мамлекеттик филармония­сына солист болуп кабыл алынган. Залкар өнөрпоз­дор Эркесары, А. Огомбаев, А. Үсөнбаев, К. Орозов,

Ш. Шеркулов, Ы. Туманов­дон таалим алган. 1957-жылы Москвада өткөн Жаштар­дын жана студенттердин Бүткүл дүйнөлүк 2-фес­тивалына катышып, лауреаттык наамга жана ал­тын медалга татыган. 1958-жылы Москвада өткөн Кыргыз искусствосу менен адабиятынын он күндүгүнө ка­тышкан. 1962–1967-жылдары В. Маяковский атындагы Кыз-­келиндер педагогикалык институтунун музыка кафедрасында иштеген. Анын аткаруусунда «Чайкама», «Маш ботой», «Кара өзгөй» күүлөрү айрыкча чет өл­көлүк угуучулар тарабынан жогору бааланган.
Козубекова – «Эрке кыз», «Бакыт» деген күүлөрдү чы­гарган. Польша, Моңголия, Венгрия, Германия Демократиялык Республикасында, Бельгия, Кытай, Алжир, Си­рияда жана СССРдин шаарларында гастролдо бол­гон. «Ардак Белгиси» ордени жана медалдар менен сыйланган. 1992-жылы Таластын А. Огомбаев айы­лындагы мектепке анын ысмы берилип, музейи ачылган.