ИМАНКУЛОВ Жүкүн

ИМАНКУЛОВ Жүкүн (8. 3. 1930-жылы туулган, Чүй облусу, Кемин району, Кичи-Кемин айылы) – искусство таа­нуучу, режиссёр, искусство доктору (1993). Ташкент театр-көркөм өнөр институтунун театр изилдөө факультетин (1955), Москвадагы искусство тарыхы институтунун ас­пирантурасын (1958) бүткөн. «СССР эл артисти Муратбек Рыскуловдун чыгармачылыгы» деген темада кандидаттык, Ленинград театр, музыка жана кинематография институтунда «Ч. Айтматов­дун чыгармачылыгы жана сахна» деген темада докторлук диссертациясын коргогон. Респ. эл чыгармачылыгы үйүнүн директору (1955), Кыргыз ССР илимдер академиясынын философия институтунун тарых жана укук бөлүмүндө илимий кызматкер (1956–1958), Ысык-Көл драма театрынын (1962), Нарын музыкалык-драма театрынын (1963) башкы режиссёру, Ош мамлекеттик педагогикалык институтунда улук окутуучу, кафедра башчысы (1965–1971), Б. Бейшеналиева атындагы Кыргыз мамлекеттик искусство институтунда до­цент (1971–1991), Бишкек гуманитардык университетинде профессор (1997–1998) болгон. Иманкулов кыргыз театры үчүн В. Шекспирдин «Ри­чард III», М. Ауэзовдун «Кара көз», «Абай», «Эн­лик-Кебек», «Түнкү жаңырык», «Байбиче-Токол» жана башка чыгармаларды которгон. Иманкулов 150дөн ашуун илимий-теориялык макалалардын, рецензиялардын автору.

Эмг.: Наш Муратбек. Ф., 1970; Искусство театра: произведения Чингиза Айтматова на сценах театров республик Средней Азии и Казахстана. Ф., 1985; Ч. Айтматов и театр. Б., 2003.