КЫРГЫЗ АКАДЕМИЯЛЫК СИМФОНИЯЛЫК ОРКЕСТРИ

КЫРГЫЗ АКАДЕМИЯЛЫК СИМФОНИЯЛЫК ОРКЕСТРИ А. Ж у м а к м а т о в а т ы н д а – музыкалык коллектив. 1969-жылы башында алгач 28 музыканттан турган камералык оркестр түзүлгөн, 1969-жылдын декабрында Кыргыз ССР телерадиоко­митетинин алдында Министрлер Советинин чечими менен курамы 46 музыканттан турган симфониялык оркестр уюшулган. Көркөм жетекчиси жана башкы дирижёру А. Жумакматов (2008-жылга чейин) болгон. 1970-жылдын 9-февралында оркестрдин тушоо кесүү концерти өткөрүлүп, композиторлор М. Абдраев, К. Молдобасанов, А. Жаныбеков, М. Бурштин, А. Мурзабаев жана башкалардын чыгармалары аткарылган. Оркестр кыргыз обончуларынын, композиторлорунун ырларынан тартып, көлөмдүү симфониялык чыгармаларга чейин Кыргыз Республикасынын телерадиокорпорациясынын алтын казынасына жаздырган. Азыркы күндө оркестр Көз карандысыз мамлекеттер шериктештиги өлкөлөрүндөгү мыкты оркестрлердин катарында. Оркестрдин коштоосунда кыргыздын атактуу ырчылары гана эмес, СССР эл артистери Е. Образцова, Е. Нестеренко, И. Архипова, Т. Куузик жана башкалар да ырдашкан, белгилүү дирижёрлор Е. Светланов, А. Жу­райтис, Б. Хайкин, Ю. Домаркос, Ю. Темирка­нов жана башкалар дирижёрлук кылган жана А. Хохлов, И. Машкевич, А. Георгиев, Ж. Каныметов, Н. Рысалиев, Р. Осмоналиев жана башка музыкант­тар да иштешкен. 2004-жылы оркестрге А. Жумакматовдун ысмы берилген. 2008-жылдан Кыргыз Республикасынын Маданият жана туризм министрлигине караштуу болгон, башкы дирижёру – Р. Осмоналиев.