БОКАРЕВ

БО́КАРЕВ Иван Васильевич [17. 05. 1923, РСФСР, Кыргыз АССРи (азыркы Казакстан Республикасы), Жети-Суу (азыркы Алматы) облусу, Ак-Суу (азыркы Сарканд) району, Бакалы кыштагы] – Даӊк орденинин толук кавалери. 1934-жылы үй-бүлөсү менен Кыргызстандын аймагындагы Кемин районунун Боролдой кыштагына көчүп келип, жашаган. Согушка чейин ошол жерде колхоздо комбайнчы болуп иштеп, 1942-жылы (айрым маалыматтарда 1943) Кемин райондук аскер комиссариаты тарабынан Советтик Армиянын катарына чакырылган. Снайперлер мектебин бүтүргөндөн кийин (1943, март) фронтко жөнөтүлгөн. Улуу Ата Мекендик согуш учурунда ал аткычтар полкунун чалгынчылар взводунда бөлүмчөнүн командири болуп, 10. 08. 1944-жылы кенже сержант И. В. Бокарев Тамошув (Польша) кыштагына жакын жерден душмандын окобуна кирип барып, ээлеп алгандыгы үчүн 21. 08. 1944-жылы ага 3-даражадагы (№ 213746), 01. 02. 1945-жылы Одер дарыясынын оң жээгине чалгынга чыгып, баалуу маалыматтарды алып келгени үчүн 14. 03. 1945-жылы 2-даражадагы Даңк ордени (№ 40659) менен сыйланган. 1947-жылы демобилизацияланып, Боролдой айлына кайткан. 1965-жылы Фрунзе шаарындагы №-3 жүргүнчүлөр паркында айдоочу болуп иштеген. Кыргыз ССРинин аскер комиссары генерал-майор И. Т. Губаревдун өтүнүчү менен 29. 12. 1980-жылы И. В. Бокаревго 1-даражадагы Даңк ордени (№ 1971) тапшырылган. 1-даражадагы Ата Мекендик согуш (11. 03. 1985), 3-даражадагы «Манас» (03. 05. 2000) ордендери жана медалдар менен сыйланган. Бишкектин Жеңиш аянтындагы мемориалдык тактага ысмы жазылган. Өмүрүнүн акыркы жылдары тууралуу маалыматтар азырынча эч жерде кезикпейт.

Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.