КАРА КЫРГЫЗ АВТОНОМИЯЛУУ ОБЛУСУНУН РЕВОЛЮЦИЯЛЫК КОМИТЕТИ

КАРА КЫРГЫЗ АВТОНОМИЯЛУУ ОБЛУСУНУН РЕВОЛЮЦИЯЛЫК КОМИТЕТИ – Кара Кыргыз АОнун (к. Кара Кыргыз автономиялуу облусу) 1924-жылы 21-октябрдан 1925-жылы 30-март­ка чейин башкарган убактылуу бийлик орга­ны. РСФСР БАКтын Президиумунун чечими м-н түзүлүп, ага И. Айдарбеков башында турган 17 киши кирген. Комитет адегенде Ташкент шаарында жайгашып, 1924-жылы декабрда Пишпекке көчкөн. Анын негизги милдети – облустук бийликтин мамлекеттик аппаратын түзүү ж-а жөнгө салуу, Совет­тердин уюштуруу съездин даярдоо ж-а аны өт­көрүү болгон. Мамлекеттик пландоо комиссиясын тү­зүп, чарба, экономика, финансылык ж. б. маселени колго алган ж-а Кыргызстандагы калктын санын, улуттук курамын ж-а малдын санын, жер аян­тын, токой байлыктарын тактоо боюнча иштер ат­карылган. 1924-жылы 22-ноябрда уюштуруу масе­лесин тейлөө үчүн аттестациялык комиссия түзүлүп, борборду, округду, районду башкаруу­га кадрлар тандалган. Ревкомдун алдында 14 бөлүм иштеген (административдик, дыйканчылык, сот, прокуратура, саламаттык сактоо, билим берүү, ички иштер, жумушчу-дыйкан инспекциясы ж. б.). Пленардык жыйындарда кабыл алын­ган чечимдер мыйзам күчүнө теңелип, бардык мамлекеттик мекеме ж-а коомдук уюмдар үчүн сөзсүз аткарылууга тийиш болгон. Мисалы, 1924-жылы 12- ноябрдан 1925-жылы 15-мартка чейин 51 жыйын өтүп, анда 665 маселе боюнча чечим чыгарылган. 1925-жылы Советтерге шайлоо өткөрүлүп, округ, район, болуштуктарда аткаруу комитеттери шайлан­ган. Ошол эле жылдын 27–30-мартында Кыр­гыз АО Советтеринин 1-уюштуруу съезди өткөн. Съезд И. Айдарбековдун отчётун угуп, комитеттин ишин канааттандырарлык деп тапкан. Съездде 11 кишиден турган Облаткомдун президиуму (төрагасы А. Орозбеков) шайланган.

Ад.: История Киргизской ССР с древнейших времен до наших дней. В 5-и томах. Ф., 1986; Курманов З. К. Политическая борьба в Кыргызстане: 20-е годы. Б., 1997; Жуманалиев А. Политическая история Кыр­гызстана (Становление политической системы Кыр­гызского общества). Б., 2005.