КЫЗ АЛА КАЧУУ

КЫЗ АЛА КАЧУУ – колуктуну ала качып, никелешүү салты; куда түшкөн кызга калың төлөөгө каражат жетишпесе же кыздын ата-эне­си кыз каалаган жерине барышына каршы чыкса жана жуучуларга макулдугун бербесе, жигит кыздын макулдугу менен кызды ала качуусу. Жигиттин атасы урук-туугандарынан киши ээрчитип, кыздын атасынын алдына түшкөн. Эки тарап жарашкандан кийин, никелешүүнүн салт­туу ырымдары улантылган. Кыз ала качуунун мындай түрү оокаттуу, урук-туугандуу бүлөлөрдө жолуккан. Улуттук салтта кыздын макулдугусуз эч убакта кыз ала качуу болгон эмес. Эгерде кыздын макулдугусуз ала качса, урук, уруулардын ортосунда жаңжал чыгып, кан төгүлгөн. Кыз ала качуу улуттук никелешүүдө өтө сейрек кездешүүчү көрүнүш болгон.