КУНУ АЙБАНАТ ЧАРБАСЫ
КУНУ АЙБАНАТ ЧАРБАСЫ – мал чарбачылыгынын баалуу тери алуучу тармагы. Негизинен куну айбанаттар – калтар, түлкү, суу күсөн, кемчет, булгун, нутрия ж. б. капаста багылат. Россияда куну айбанаттарды капаста өстүрүү 16–17-кылымдарда башталган. Бирок ал анча өнүккөн эмес, анткени колдо багылган куну айбанат териси жапайыныкынан кымбат турган. СССРде Куну айбанат чарбасы 20-к-дын 20-жылдарынын аягынан өнүгө баштап, чет өлкөлөргө сатуу үчүн куну айбанат терисин даярдоо боюнча адистештирилген совхоздор (Москва, Архангельск, Тюмень облусунтарында) уюштурулган. Чет өлкөлөрдө куну айбанаттарды капасканада өстүрүү 19-к-дын аягында (Канадада) башталган. АКШ, Дания, Швеция, Норвегия, Финляндия, Канада, Польшада негизинен суу күсөн багуу жакшы өнүккөн. Кыргызстанда атайын куну айбанат чарбасы. болбогону менен, куну багуучу жеке фермерлер бар.