КИНГСТОН (Ямайка мамлекетинин борбору)
КИ́НГСТОН – Ямайка мамлекетинин борбору, шаар. Ямайка аралынын түштүк-батыш бөлүгүндө, дөңсөөлүү түздүктө, Кариб деңизинин жээгинде жайгашкан. Калкы 937 7 миң (2025). Эл аралык аэропорту бар. Деңиз порту (жылына 18 млн т жүк ташылат). Жыл сайын август–октябрда ураган болуп турат. Өлкөнүн маанилүү соода-
экономикалык борбору ж-а Кариб деңизиндеги ири порт. Британиялык келгиндер тарабынан 1693-жылы негизделген. 1703-жылы өрттөн жапа чеккен. 1872-жылы Ямайканын административдик борбору статусуна ээ болгон. 1944-жылы Кингстондо Ямайканын жаңы конституциясы кабыл алынып, 1950-жылдардын аяк ченинде Вест-Индия федерациясынын курамына киргизилип, арал өзүн-өзү башкаруу укугуна ээ болгон. 1962-жылы августта Ямайка көз каранды эместикке ээ болгондон анын борбору. Кингстондун борборунда заманбап курулуштар курулган. Чыгышында Рокфорт чеби (17-кылым), Сент-Томас чиркөөсү, парламент үйү (18-кылым) ж. б. бар. Өлкөнүн ишкер, ири экономикалык ж-а финансы борбору. Ири компаниялардын штаб-квартиралары жайгашкан. Нефть ажыратуу (суткасына 35 миң баррель; Венесуэла м-н Мексикадан алат), айыл чарба продуктуларын кайра иштетүүчү, тамеки, жеңил, тамак-аш (пиво, ром, кофе) ө. ж. ишканалары, бал камыштан этил спиртин алуучу 2 завод (жылына 220 млн л; үчүнчүсү курулууда) иштейт. Кустардык кол өнөрчүлүгү (белек-бечкектерди даярдайт) өнүккөн. Кингстон – баңгизаттарды (марихуана, кокаин, героин) жашыруун өндүрүүнүн ири борбору. Институттар [анын ичинде Ямайка институту (1879)], технологиялык университет (1958), музейлер (анын ичинде аскер, Боба Марли), улуттук галерея бар. Ботаникалык бак уюштурулган. Кариб деңизинин бассейниндеги өнүккөн туризмдин ири борборлорунун бири (негизинен АКШдан келет; 65%).