КАНАЛИЗАЦИЯ

КАНАЛИЗА́ЦИЯ – ыпылас (заң-заара аралаш­кан) сууларды чогултуп, аны тазалоочу жай­ларга берүүчү инженердик курулмалардын, жабдуулардын ж-а санитардык иш-чаралардын комплекси; иш­телип чыккан ж-а булганган катуу же суюк кал­дыктарды ж-а жаан сууларын чогултуп, калк жашаган пункттардан ж-а өнөр жай ишканалары­нан сыртка агызып чыгаруучу жер астындагы суу жүрүүчү түтүктөр системасы канализация тармагы деп аталат. Жер асты м-н кир сууну алып чыгып, кайра иштетүүдө же атайын казылган көлмө­лөргө куюуда санитардык талап сакталышы керек. Шаарларда курулат ж-а шаар чарбасындагы негизги элемент болуп эсептелет. Канализациянын эле­менттери – санитардык приборлор, агызуучу түтүктөр.
Максатына ж-а жайгашышына жараша негиз­ги 2 түргө бөлүнөт: и ч к и канализация – имараттын ж-а өнөр жай ишканаларынын булганыч ж-а жаан­-чачын сууларын сырткы канализация түйүндөрүнө жет­кирет; с ы р т к ы канализация – агым чогулмаларын кайра иштетүүчү жайга же көлмөгө жеткирет; суу агызуучу түтүктөр, насос станциясы ж-а тазалоочу курулмалардан турат.