КАМЕНСК-УРАЛЬСКИЙ
КА́МЕНСК-УРА́ЛЬСКИЙ – Россиядагы шаар. Свердлов облусунда. Ортоңку Уралдын түштүк-чыгыш капталында, Каменка дарыясы Исеть дарыясына куя бериште жайгашкан. Калкы 160,3 миң (2025). Темир жол бекети. Екатеринбург шаары м-н автомобиль жолу аркылуу байланышат. 1682-жылы пайда болгон. 1935-жылдан шаар. 1940-жылдан азыркыдай аталат. Шаар – облустун ири өнөр жай борбору. Алюминий түтүктөрүн жасоочу, электр-механикалык ж. б. заводдор, түстүү металлургия өндүрүшү үчүн жабдуу, жеңил, курулуш материалдар өнөр жай ишканалары иштейт. Ыйык Троица собору (1790–1808), Преображение ж. б. чиркөөлөрү сакталган. 2001-жылы Александр-Невский саат мунарасы курулган. Ондон ашык ЖОЖ (анын ичинде филиалдар, өкүлчүлүктөр), китепканалар, музейлер (анын ичинде край таануу, геология ж. б.), театрлар, Красногорск ЖЭБ бар.