ИБН АЛ-ФАКИХ
ИБН АЛ-ФАКИ́Х Абу Бекр Ахмед ибн Мухаммед ибн Исхак ал-Хамадани – болжол менен 9-кылымдын аягы – 10-кылымдын баш ченинде жашаган араб тарыхчысы, 902–03-жылдарда жазылган 5 томдук «Китаб ахбар ал-Булдан» («Чет өлкөлөр жөнүндө китеп») аттуу географиялык эмгектин автору. Хамадан шаарында туулган. Ибн ал-Факихтин чыгармасында Иран, Орто Азия жана түрктөргө караштуу жерлердин, шаарлардын аны менен кошо ислам өлкөлөрүнүн саясий түзүлүшү, элдеринин кесипчилиги ж. б. жөнүндө маалыматтар бар. Анда азыркы Кыргызстанга караштуу жерлер да камтылып, калк жашаган кыштак-шаарлардын тизмеси менен алардын аралыгы кошо берилген. Түрк урууларынын аталышы менен бирге эле кыргыздар жана алар жашаган жерде жыттуу мускус көп жолугары да эскерилет. 1885-жылы нидерланд чыгыш таануучусу М. де Гуе (1836–1909) ал эмгектин кыскача үзүндүсүн басып чыгарган.
Ад.: Крачковский И. Ю. Арабская географическая литература // Изб. соч. Т. IV. М.; Л., 1957.
Т. Жуманалиев.