ДМИТРИЕВ Николай Михайлович
ДМИ́ТРИЕВ Николай Михайлович (19.12. 1917, Оренбург облусу, Новоорск району, Кумак кыштагы –
19.12.1981, Саранск) – Советтер Союзунун Баатыры (31. 08. 1941), запастагы майор (1959). Н. М. Дмитриев Улуу Ата Мекендик согуш учурунда Советтер Союзунун Баатыры деген наамды биринчи алган кыргызстандык жоокер болуп эсептелет. Оренбург финансы техникумун (1933) бүтүрүп, согушка чейин Фрунзе облусунун Калинин районунун (азыркы Жайыл району) Калинин айлында жашап турган жана Фрунзе шаарындагы «Эт даярдоо» ишканасында башкы бухгалтер болуп иштеген. Советтик Армиянын катарына ошол эле шаардык аскер комиссариаты тарабынан 1939-жылы сентябрь айында чакырылып, алгач Москадагы 1-пролетардык аткычтар дивизиясында, 1941-жылдан Батыш фронтуна караштуу 20-армиянын 1-мотоаткычтар дивизиясында кызмат өтөгөн. 1941-жылы 10-июлда Белоруссиядагы Орша шаарынын батышындагы 20 чакырым алыстыктагы Адров өзөнүнүн жээгиндеги урушта өзү оор жарадар болгонуна карабай, душмандардын 4 танка, 2 бронетранспортерун (башка кабарларда 3-5 танка, 7 БТР) талкалап, кыйраткан. Бул эрдиги үчүн Советтер Союзунун Баатыры наамы (№ 551) ыйгарылган. 1945-жылы Ленинград артиллериялык окуу жайын бүтүрүп, согуштан кийин Саранск шаарында жашап, «Электр түзөткүч» заводунда иштеген. Саранскидеги бир көчөгө анын мемориалдык тактасы орнотулган. Ленин, Кызыл Жылдыз, «Ардак Белгиси» ордендери жана медалдар менен сыйланган.
Ад.: Алымкулов Н. А. Кыргызтанцы – герои Советского Союза и полные каваперы Ордена Славы: новые факты, имена. Б., 2025.