КАРА-СУУ (Ош облусундагы шаар)

КАРА-СУУ (Д ө л ө н ч ө к) – Ош облусундагы шаар. Кара-Суу районунун административдик борбору. Шаар ста­тусун 1960-жылы алган. Облустун борбору Ош шаарынан 24 км түндүк тарапта. Ош – Кара-Суу түздү­гүндө деңиз деңгээлинен 720–780 м бийикте, Ош – Биш­кек автомобиль жолунун боюнда жайгашкан. Калкы 27 миң (2022). 1959-жылдан 2007-ж. чейин шаар калкы 1,7 эсе өскөн. Шаарда кыр­гыз, өзбек, орус, татар, тажик ж. б. улут өкүл­дөрү жашайт.
Кара-Суу шаары – Ош облусунун ири өнөр жай борбору. Шаардын өнөр жайынын негизин – пахтаны кайра иштетүү тармагы (облустун өнөр жай продукциясы­нын 52%тен ашыгы), «Ак алтын» (райондо өндүрүлгөн кебез буласынын 40,0%ин даярдайт) ж-а «Бектур» АК (экөө биригип райондун өнөр жай продукциясынын 90%ин берет), кебез буласын өндүрүүчү ишканалар түзөт. Тамак-аш, ун-ак­шак, аралаш тоют даярдоочу өнөр жай өндүрүшү өнүккөн. «Аска» АК (өндүрүштүк кубаттуулугу 380 т чигит ж-а 150 т күн карама данын иштете алат) өсүмдүк майын чыгарууга адистешкен. «Улук нан» нан заводу иштейт. Ун-акшак ж-а аралаш тоют ишканасы, «Кара-Суу дан азык» АК шаардын өнөр жай чыгарган продукциянын 40%ке чейинкисин өндүрөт. Машина куруу ж-а металл иштетүү тармагында автомобиль оңдоо­чу «Кара-Суу» АК иштейт.
Кара-Суу шаары – Ош облусунун ири жол тоому. Негизинен автомобиль ж-а темир жолдору өнүккөн. Кара-Суу темир жол бекети – Кыргызстандын түштүгүндөгү ири бекет.
Шаарда 7 орто мектеп (анын ичинде балдардын спорт ж-а музыкалык мектептери), китепканалар, маданият үйү, кинотеатр, бала бакча, стадион, мечит бар. Оорукана, бейтапкана, дарыкана, учук диспан­сери, санитария-эпидемиология станциясы, тур­муш-тиричилик кызматы, ресторан, кафе-бар­лар, «Кара-Суу» базары (Орто Азиядагы эң ири ба­зарлардын бири), тамактануу ж-а соода жайла­ры иштейт. В. И. Ленинге, Улуу Ата Мекендик согушта курман болгондорго эстелик тургу­зулган.