АЗОТ ТОПТОО

АЗОТ ТОПТОО – атм‑дагы мол. азотту (N₂) азоттуу бирикмелерге айландыруу процесси. Азотту ар кандай азот топтоочу микроорганизмдер (бактериялар, актиномицеттер, ачыткыч козу карындар, козу карындар, көк жашыл балыр­лар) топтойт. А. т. – жаратылышта азоттун айлануусунда чоң роль ойноочу маанилүү биол. процесс. 1 га топурактын үстүндөгү атм‑да 70 миң т эркин абалдагы азот кармалып турат. А. т‑нун натыйжасында анын бир бөлүгү жогорку түзүлүштүү өсүмдүктөр үчүн пайдаланы­лат. Көк жашыл балырлар шалы плантация­сында гектарына бир жылда 200 кг азот топтойт. Буурчак өсүмдүктөрдөгү түймөк бактерия­лардын аракетинен бир сезондо 100‑250 кгга чейинки азот топуракка сиңирилет. Бул про­цесстин а. ч. өсүмдүктөрүнүн түшүмдүүлүгүн арт­тыруу жана топурактын асылдуулугун жогору­латуу үчүн эң чоң мааниси бар. Ошондуктан чанактуулардын уругун түймөк бактериялардын препараттары менен аралаштырып себишип, кийинки жылы анын ордуна дан өсүмдүктөрүн ай­дашат. А. т‑ну изилдөө өтө маанилүү. 1894‑ж. С.Н. Виноградский А. т‑нун натыйжасында аммиак (NH₃) пайда болоорун болжолдоп айт­кан. Азыркы убакта азоттун оор изотобун (N¹⁵) колдонуу менен жүргүзүлгөн изилдөөлөрдө анын тууралыгы аныкталды. А. Н. Бах А. т‑ну (1934) окистендирүү‑калыбына келтирүүчү ферменттер­дин аракеттеринин натыйжасы деп ойлогон. Мол. азоттун (N₂) аммиакка (NH₃) чейин ка­лыбына келиши курамында темир, молибден, магний болгон жана электрондорду N₂ ташуучу ферменттик системанын катышуусу менен ишке ашары ырасталган. А. т‑чу ферменттик система N₂нин калыбына келишин катализдейт. Мында керектелүүчү энергия аденозинтрифосфат­тан (АТФ), калыбына келтиргичтен, мис., мол. суутектен (Н₂) же сульфит гидратынан (Na₂S₂0₄) алынат. Ошентип, ферменттердин жардамы менен жүрүүчү А. т. кычкылтекти керектебестен эле, калыбына келүүчү процесс болуп саналат. А. т‑нун мааниси өтө чоң. Б.Бегалиева.