ГОМУЛКА

Владислав (6. 2. 1905, Бялобжеги, Кросно ш-на жакын, Галиция жана Лодомерия королдугу, Австро-Венгрия  – 1. 9. 1982, Варшава, ПЭР) – польшалык мамл. жана саясий ишмери. Польша жумушчу партиясы (ПЖП) БКнын Генералдык секретары (1943–48), Польша Бириккен жумушчу партиясы (ПБЖП) БКнын 1-секретары (1956–70). 1926-жылдан Польша КПнын мүчөсү. 1932–34-ж. коммунисттик ишмердүүлүгү үчүн эркинен ажыратылган. 1934–35-ж. Москвадагы Ленин мектебинде окуган. 1936–39-ж. кайрадан Польшада камакта. 1939–41-ж. СССРде жашаган. 1941-жылдан ВКП (б) нын мүчөсү. 1942-ж. польшалык Каршылык көрсөтүү кыймылына катышкан. Польша Жумушчу партиясын (ПЖП) түзүүчүлөрдөн. 1942-жылдан ПЖП БКнын мүчөсү. 1943–48-ж. ПЖП БКнын Генералдык секретары. 1944-ж. июлдан Польша Улуттук боштондук комитетинин мүчөсү. 1944-ж. декабрдан кайтарылган аймактар ​​б-ча министр жана вице-премьер-министр. 1948-ж. 3-сентябрда Г. "оңчул улутчулдуктан четтеп кетти" деп айыпталып, ПЖПнын Генералдык секретары кызматынан алынган. 1951–54-ж. түрмөдө отурган. 1956-ж. августта анын партиялуулугу калыбына келтирилип, ПЖП БКнын 8-пленумунда ПБЖП БКнын 1-секретары жана саясий бюро мүчөсү. Ал бир катар реформаларды жүргүзгөн. 1970-ж. азык-түлүк бааларынын көтөрүлүшүнө нааразы болгон массалык толкундоолордун натыйжасында отставкага кетүүгө аргасыз болгон.