АНДАБЕКОВ Сейитказы

АНДАБЕКОВ Сейитказы (18. 10. 1925-жыл, Нарын облусу, Ат-Башы району, Каракоюн өрөөнү, Кара-Булак кыштоосу – 23. 12. 2015-жыл, Бишкек шаары) – артист, Кыргыз ССР эл артисти (1984), Улуу Ата Мекендик согуштун катышуучусу. 1946-жылдан Нарын облустук музыкалык драма театрында, 1949-жылы ал театр жабылып калганына байланыштуу Ысык-Көл облустук драма театрында, 1961-жылдан кайрадан Нарын облустук драма театрында эмгектенген. Образдарды жаратууда таасирдүү тереңдикти таап, жөнөкөй, жеткиликтүү бере алган. Аткарган негизги ролдору: Хуан Цуан (Ж. Турусбеков, «Ажал ордуна»), Аккан, Мамалак (К. Жантөшев, «Курманбек», «Шайтан кыз»), Кулан (К. Маликов,

«Жаңыл»), Чиновник (Н. Гоголь, «Үйлөнүү»), Чаар солдат (В. Вишневский, «Оптимисттик трагедия»), Ташбалта (Г. Гулям, «Ташбалта ашык»), Жарас (М. Ауэзов, «Айман-Шолпан»), Мергенчи Мажит (Б. Өмүралиев, «Жаңырык»), Шүкүр балбан, Байков (Ж. Садыков, «Боз торгой», «Жукеев Пудовкин»), Чыныбай (Т. Абдымомунов, «Ашырбай»), Бобчинский (Н. Гоголь, «Текшерүүчү»), Токторбай (К. Мамбетакунов, «Үкөй»), Кожо Насирдин (В. В. Соловьев, «Кожо Насирдин»), Глостер (У. Шекспир, «Король Лир»), Сабыр (А. Жакшылыков, «Көкөй кести») жана башкалар. С. Андабеков көптөгөн ролдорду аткаруу менен бирге обончу-аткаруучулук өнөрүн да элге тартуулап, концерт берген. «Кыздар ай», «Кылпылдама», «Сулуу кыз», «Акежан», «Беккара», «Там башында», «Карылардын дуэти» жана башка тамашалуу ырларды К.Карасартова менен бирдикте ырдаган. Ыр-бий дуэттерин чебер аткарып, кыргыз, казак, уйгур, өзбек элдеринин сүймөнчүлүгүнө ээ болгон. I даражадагы Ата Мекендик согуш ордени, III даражадагы «Манас» ордени жана медалдар менен сыйланган.